كيف تخطط للسنة الاولى من بعثتك؟

وصلني هذا السؤال في http://ask.fm/aalradadi قبل اسبوع

لانه الاخ العزيز اللي سأل هذا السؤال ماهو اول شخص يسأل عن اللغة، تجاوز الاختبارات، والحصول على قبول ولا اخر واحد يسألني هذا النوع من الاسئلة، هذه مجموعة نصائح أتمنى انها تفيد اي شخص على وشك بدأ مرحلة الابتعاث او مبتعث وفي اول ثلاثة أشهر من مرحلة اللغة.

نصيحتي لك انه تعلم اللغة ما يكون اولوية بالنسبة لك في هذه المرحلة الحساسة من بعثتك. الكلام غير منطقي اكيد (في مرحلة اللغة وماهو اهم شيء اني اتعلم لغة؟) نعم، ماهو اهم شيء بالنسبة لك في هذه المرحلة. المهم حالياً هو الحصول على افضل قبول ممكن. وأفضل قبول ممكن هو افضل جامعة ممكن تحصل عليها حسب إمكانياتك، بعيد عن الاحباط اللي ماله داعي، وبعيد عن الأحلام الغير واقعية مثل هارفارد وام آي تي لشخص لغته ضعيفة مثلاً.

لانه الحصول على افضل قبول ممكن هو الاولوية واهم شيء بالنسبة لك حالياً انصحك انك تبدأ من النهاية، كيف؟

تبدأ تشيّك على الجامعات الموصى بها في موقع وزارة التعليم العالي (هنا) وتبدأ تصنف الجامعات الى ثلاثة انواع:

١. الجامعات الحلم: هنا تحط الجامعات الاقوى في تخصصك، الجامعات الكبيرة جداً Ivey league

٢. الجامعات الأفضل بالنسبة لإمكانياتك: هنا حسب إمكانياتك تعرف ايش الجامعات اللي ممكن تجيب قبول فيها وتحطها هنا.

٣. الجامعات الاستبنة: من اسمها، والامريكان يُسموها Safety Net وهذه الاسهل المفروض اللي ممكن تجيب قبول فيها باقل مجهود ممكن.

بعد ما تحدد الجمعات تدخل موقع كل جامعة وتبحث عن admission requirements وفيها تبحث عن deadlines واللي هي المواعيد النهائية للتقديم وتسليم كافة الاوراق الخاصة بالقبول. وتسجل هذه المواعيد في الـ calendar وتبدأ تخطط مواعيد اختبارات اللغة وكتابة التوصيات وخطابات القبول بناءً على هذه المواعيد.

اما تجي امريكا وتبدأ تتعلم من الصفر وبعد مرور كم شهر تبدأ تفكر في القبول ما انصح صراحة. رح تدخل في ربشة انت في غنى عنها.

كثير يعتقدوا انه الأفضل ما يختبر اختبار اللغة الا لما يصير جاهز، وهذا خطأ كبير. المفروض بعد الوصول بشهر يصير اول اختبار حتى لو كنت متأكد انك مارح تعديه، لهذه الأسباب:

– تعرف مستواك جيداً ومن خلاله تحدد الجامعات في الثلاثة القوائم اللي فوق لما تقارن بين درجاتك في الاختبار وأقل درجة ممكن يقبلوها.

– أسئلتك في معهد اللغة تكون افضل ومركزة بشكل اكبر. عرفت ايش مواطن الضعف عندك، بالتالي تروح المحاضرات وانت مجهز نفسك اكثر وعارف أسئلتك. وغالباً اللي يشتغلوا في المعهد رح يساعدوك تتجاوز هذه المشاكل.

– لذلك الهدف من اول اختبار هو انك تتعرف على مستواك بشكل افضل، وخلال الشهر اللي بعد اول اختبار وقبل ثاني اختبار تراجع تقرير الاختبار اكثر من مرة وتحاول تعرف كيف تتطور نفسك.

بعد أول اختبار جهز نفسك لثاني اختبار مباشرةً، بعد شهر او ٦ أسابيع (بعض الاختبارات تحط مواعيد بين كل اختبار واخر، الجيمات مثلاً شهر اقل شيء) وخلال استعدادك لهذا الاختبار تكون فكرة الاختبار واضحة عندك وغالباً رح تكون افضل. وعموماً الملحقية تعوض كل اختبار لغة مهما كانت درجته. واللي على حسابهم الخاص، الله يعينهم.

لا طبعاً. تجهز خطاب الدراسة، التوصيات، تفتح ملفات في مواقع الجامعات اللي تطمح لها online applications وتغير القائمة اللي عندك الخاصة بالجامعات بناءً على اي معلومة جديدة وصلتك (من زملاء سعوديين، مواقع، بحثك الشخصي).  كل هذه الخطوات بتدخلك جو القبول اكثر وبتزيد من همتك وجديتك في هذه المرحلة، وصدقني تقدر تنبسط اكثر وانت عارف انك ماشي على خطة.

يعتمد على موعد بعثتك (سنة وبعد التمديد سنة ونصف) ويعتمد على المواعيد النهائية للجامعات اللي مقدم لها. لازم تحاول الى اخر لحظة، وكل مرة تحاول تكون افضل. ومع اقتراب المواعيد النهائية طبيعي يزيد الضغط النفسي، لكن طبيعي برضو انك تزيد مجهودك ووقت دراستك.

.

لما توصل نقطة النهاية في مرحلة اللغة، درجاتك رح تساعدك تعمل قائمة نهائية وواقعية للجامعات اللي ممكن ترسل لها درجاتك النهائية (المفروض انك مكمل كل شيء اخر الا درجات اللغة) وفي النهاية تكون عرفت إمكانياتك وارسلت افضل درجة ممكنة لك.

بنفس العقلية اللي فوق مع اختبارات اللغة، تواجه هذه الاختبارين اللي المفروض مطلوبة لكليات البزنس. بس افضل انك تبدأ خامس او سادس شهر. الا لو انك متمكن من اللغة جداً. لانه هذه الاختبارات تتطلب مهارات لغوية صعب ممكن تكون عند شخص ضعيف جداً في اللغة. وخد الاختبارات اكثر من مرة، مارح يفرق الا لو قدمت لهارفارد وأمثالها. (هنا موضوع سابق لي عن كيفية تجاوزي للجيمات)

لذلك خلاصة الكلام:

– ابدأ من النهاية، من اخر موعد لتسليم كافة أوراق القبول.

– لا تركز بزيادة على على تحسين اللغة، تطوير لغتك الانجليزية يبدأ من مرحلة اللغة ويستمر معك طول حياتك. مرحلة اللغة ركز على الاختبارات اللي من المفترض انها تساعدك انك تتحسن في اللغة وقت الاعداد لها، البعض يحاول يكون مثالي في الكتابة مثلاً، رغم انها ماهي اولوية في هذه المرحلة الحرجة، الاولوية للقبول حالياً. بعد القبول طور نفسك في الكتابة وطريقة التحدث.

– قائمة الجامعات اللي ترغب تقدم لها لا تكون قليلة (جامعتين مثلاً!) ولا كثيرة بطريقة مشتتة (١٥!!) ولازم تحدث فيها حسب درجاتك وترضى انك تحذف جامعات تتمنى تنقبل فيها وتتقبل الواقع.

– أتواصل خلال هذه الفترة مع الجامعات، كل ما تروح مكان حاول تنسق لزيارة للجامعة وتقابل مكتب القبول، خليهم يشوفوا وجهك ويعرفوا اسمك. بتفرق كثير جداً!

– حاول تشتغل على كتابة الإيميلات اللي تسال فيها عن طلبات القبول، ممكن نجلس مع احد مدرسي المعهد وتطلب منه ينقح معاك الايميل اللي تفكر ترسله للجامعات. (ممكن يكون واحد وترسله لأكثر من جامعة).

في النهاية لازم تكون results oriented وبعد كل اختبار تخطط للاختبار الثاني، وتتواصل مع الجامعات بإستمرار. لا تضحك على نفسك وتعتقد انه سنة مدة طويلة جداً، لانها بتعدي بسرعة كبيرة ولازم تخطط وتحاول تستغل كل لحظة فيها. لازم تشتغل على نفسك هذه المرحلة، وتخرج من محيط الراحة وتتقبل الفشل بكل اشكاله. بعد التوكل على الله، بإذن الله النجاح بيكون نصيبك والقبول قادم لا محالة.

بالتوفيق

احمد الردادي

حصل على قبول ثلاثة جامعات، درس في اثنين وانرفض من خمسين جامعة يمكن.