كيف تجاوزت الجيمات .. مرتين!

في البداية لازم نوضح نقطة مهمة جداً ، الجيمات مافيه درجة معينة اذا جبتها تعتبر نفسك نجحت او فشلت .. كله يعتمد على الجامعة اللي تطمح تقدم لها والدرجة كذلك ماجستير كانت او دكتوراة. في ٢٠١٠ جبت ٤٥٠ وكانت سعادتي لا توصف .. لانه الجامعات اللي قدمت لها كانت متوسطة وطالبة ٥٠٠ بعضها قلل الدرجة المطلوبة بسبب معدلي في الجامعة. وقبل كم شهر جبت ٥٨٠ وكنت متحطم جداً لأني كنت اطمح ل٦٠٠ الدرجة المطلوبة (على الأقل) من كل الجامعات اللي قدمت لها للدكتوراة. 
المرة الاولى اللي عدّيت فيها الاختبار مثل ما قلت لكم كانت الدرجة ٤٥٠ ، الكتاب اللي استخدمته وقتها كان  كتاب عادي ما انصح به (Cracking the gmat). وما انصح اي شخص انه يطمح لهذه الدرجة لانها ضعيفة .. رغم انها جابت لي قبول. اما بخصوص المرة الثانية كانت الأسبوع الماضي وكانت الدرجة ٦٤٠. اذا كنت تطمح لدرجة اكبر أتمنى انك ما تتجاهل المعلومات اللي في الأسفل وتعتقد انها مارح تساعدك .. لأني عملت بحث مو سهل عن افضل مراجع الدراسة لهذا الاختبار وقرأت لأشخاص درجتهم كانت ٧٨٠. (الاختبار من ٨٠٠)
فيديو تعريفي عن الاختبار
هذا فيديو عن الاختبار .. تعريفي فقط ممكن يفيد اي شخص يحب يعرف معلومات بسيطة عن الجيمات
افضل المراجع بالنسبة لي:
الكتب الرسمية
الكتب الرسمية مهمة مهمة مهمة .. أسئلة سابقة للاختبار من القائمين على الاختبار نفسهم ، فيه ثلاثة كتب:

GMAT official guide 13th edition
GMAT official guide quantitive review
GMAT official guide verbal review
الكتب فيها أسئلة ووأجوبتها بشكل مختصر وبدون شرح كبير .. لكن في اليوتيوب فيه قناة متخصصة بشرح أجوبة الكتب الرسمية بشكل جميل وهذا اسمها  perfectScores هندي بطل جداً وقناته تقدم طرق اخرى لشرح مواضيع يتم اختبارها في الجيمات. وايضاً قناة MagooshGMAT
كتب مانهاتن
انصح بشراء كامل كتب مانهاتن بمبلغ ١٤٣ دولار ، لانه لو اشتريت الكتب كاملة مانهاتن يعطوك ١٢ اختبار تجريبية ممتازة جداً. وميزة مانهاتن انه بعد كل موضوع يقلك رقم الأسئلة في الكتب الرسمية عشان تتدرب وقتها وتختبر مدى فهمك لهذا الموضوع. كتب مانهاتن ممتاز لبناء الأساس وبمذاكرتها بضمير وعمل خطة دراسية محترمة وتختبر اختبارات تجريبية صعب ما تجيب ٥٥٠ في الاختبار على الأقل. لو إمكانياتك عالية ولغتك ممتازة أتوقع تجيب درجة محترمة جداً في الاختبار فقط بمانهاتن. 
ماجووش Magoosh.com
شخصياً بعد مانهاتن اختبرت وجبت ٥٨٠. الجامعات رفضت حتى مراجعة ملفي لانه اقل درجة تسمح لهم يطالعوا في الملف ٦٠٠. سمعت نصيحة زميلي هادي واشتركت في ماجووش. الموقع عليه ريفيو محترمة وما استغرب ابداً .. ميزته يعطيك ٤٥٠ سؤال ماث و٥٠٠ فيربيل وكل سؤال له فيديو خاص يشرح لك كيف تحل السؤال. ٩٩ دولار يعطيك اشتراك لمدة ستة أشهر او سنة. بالإضافة للأسئلة فيه فيديوهات تشرح مواضيع الماث الفيربيل بشكل مفصل وجميل جداً جداً. 
ماجووش رفع مستوايا في الرياضيات بشكل كبير جداً جداً ولله الحمد. لكن للفريبل مانهاتن افضل وبمراحل. بإمكانك الاشتراك فقط في الماث في ماجووش وشراء كتب الفيربيل لمانهاتن. 
منتدى Beat The Gmat
بعد مرور شهر او شهر ونصف على مذاكرتك وتأسيس نفسك بشكل ممتاز في الماث والفيربيل انصح بدخول هذا المنتدى كل يوم تبغى تذاكر فيه لو لنصف ساعة. ميزته يعطيك أسئلة ممكن ما تشوفها في مراجعك وطرق حل. اشترك في الموقع واسأل عن كيفية حل أي مسألة ممكن تواجهك بطريقة اسهل .. رح تعجبك الردود وتفاعل الخبراء في الموقع. الموقع يعطيك فرصة تتواصل مع أشخاص جابوا ٧٨٠ في الاختبار .. مجاناً!
نصائح عامة:

١. لا تحطم نفسك وتقول الجيمات صعب مستحيل .. شخصياً كنت في الرياضيات سيء جيداً في الثانوي ورسبت في الرياضيات في اول ترم دراسي في البكالوريوس وعدّيت ب٦٠ في الترم الثاني!! في اختبار ٥٨٠ جبت معدل ٧٩٪ في جزء الماث وهذا رقم كبير جداً .. المشكلة كانت في الفيربيل وقتها. كل شيء مع التدريب يتحسن بإذن الله.

٢. يومياً ساعتين لثلاثة مع راحة في اجازة نهاية الأسبوع ممتازة. لكن في ايام تحتاج فيها ساعات اكثر. 

٣. لا تركز في مذاكرتك على عدد الأسئلة ولكن على كيف تحل الأسئلة. لو يوم كامل ضيعته في سؤال واحد بس تفهمه تمام افضل من حل ٣٠ سؤال سهلة بالنسبة لك. بإختصار ركز على مذاكرة مفاهيم رياضيات ولغة وطرق حل. وليس على عدد أسئلة. 

٤. تقريباً في الاختبار كل سؤال رح يحتاج تحله في دقيقتين في الرياضيات ودقيقة ونصف في اللغوي .. حاول مع مرور الوقت في المذاكرة تدرب نفسك على الحل السريع. 

٥. حاول تدرب نفسك على التركيز لمدة طويلة عشان تتهيأ للإختبار وحاجتك وقتها للتركيز لوقت طويل. مقالة عن التركيز كتبتها سابقاً أتمنى تفيدكم :http://mymarketingbuzz.blogspot.com/2013/04/blog-post.html
٦. القائمين على الاختبار يعملوا دائماً على تطوير الاختبار وزيادة ذكاءه : مثلاً مع إجاباتك الصحيحة يبدأ الاختبار بمحاولة الإيقاع بك ووضع خيارات ممكن توصل لها لو اخطأت في احد مراحل الحل. الاختبار خبيث جداً. 

٧. طبيعي جداً في الجيمات انك ما تعرف حل كل الأسئلة وتجيب درجة محترمة جداً. لكن لازم تكون شاطر في توقع الأجوبة الصحيحة وإلغاء الأجوبة اللي واضح انها خطأ. 

٨. حاول تخلي الاختبارات التجريبية وقت الاختبار الحقيقي اللي ناوي تأخذه. لو كان الساعة ٨ الصباح اختبارها في نفس الساعة من الشهر اللي قبل. اتعود على هذا الموعد. 

٩. اشتري دفتر صغير سجل فيه نتائج مذاكرتك. مثلاً جاوبت اليوم ١٠ أسئلة في الرياضيات .. اخطأت في ٣ .. اكتب في الدفتر تاريخ اليوم والخطأ في أي موضوع. يساعدك تعرف نقاط قوتك ونقاط ضعفك. 
مهم جداً وانت تحل كل سؤال تعرف ايش الموضوع اللي يتم اختبارك فيها. ما بتخرج من هذه المواضيع اللي جمعتها لكم حسب تصنيف كتب مانهاتن
اذا عندكم اي أسئلة يا ليت يتم كتابتها في ردود الموضوع وان شاءالله احاول قد ما اقدر أرد عليها كلها وأي شخص عنده خبرة في الاختبار يا ليت يساعدنا. منها نعمل سلسلة مواضيع مستقبلية عن هذا الاختبار المُبالغ فيه وكذلك يكون اسهل للمهتمين مستقبلاً انهم يشوفوا كل ما يخص الاختبار هنا. 
بالتوفيق للجميع. والحمد لله اولاً واخيراً على توفيقه والهامه لي بإتباع الأسباب المذكورة أعلاه. 
احمد الردادي

  1. يعطيك العافيه اخوي احمد ،، انا مقدم على ماستر في المنجمنت في جامعة باري وطلبوا مني ٤٠٠ فالجيمات وامتحنت وجبت اقل من العلامه المطلوبه ، وانا ابي القبول باسرع وقت وارسلت لهم خطاب ان عندي خبره ٦ سنوات عمل ولين الحين انتظر ردهم
    وفيت كل الشروط ماعدا الجيمات
    علماً ان دراستي تبدا ف شهر ١ للاسف وانا للحين متاخر ماوصلني قبول منهم او رد بحكم الاجازه اللي هم فيها الحين
    اللي اتواصل معاه واحد اسمه Dave Fletcher

    1. كثير جامعات تعادل الجيمات اذا عندك ٤ سنين واكثر بعد التخرج
      في شخص اتعاملت معاه جبلي قبول من غير جيمات يعرف يزن ويتفاهم مع الجامعات ياخذ ٣٥٠ دولار شامل رسوم الابليكشن . انا مابسويله دعايه بس انا ساعدني وان شالله يساعدك هذا رقمه يتكلم انجليزي تقدر تتواصل معاه واتس +17862187218

      1. سوْال لو سمحتي اختي
        هذا الرجل ممكن التواصل معه حاليا ؟

        وبس عشان أعرف كيف أتواصل معاه
        يتكلم عربي وإلا انقليزي؟

  2. السلام عليكم اخوي احمد
    كيف اتغلبت على الاساله الي منت متأكد من جوابها . هل عندك ستراتيجية محدده للتغلب عليها.
    شكراً للمعلومات الطبيه الي طرحتها وتمنى لك كل التوفيق والنجاح
    اخوك سلمان العالي

  3. الله يعطيك العاافية
    أنا اختباري بعد اسبوع بإذن الله
    أيش الأفضل بحكم الوقت الضيق ؟
    شكرا لك

  4. حسين الدوشان

    الف شكر ع المعلومات الأكثر من رآئعة سوالي هل فعلا لو ركزت ع الاسئله اللغوية راح تكون النتيجه أفضل

  5. انا احتاج نصيحتك انا جدا متأخر الان اخر موعد للتقديم على الدكتوراه للمالية شهر يناير 2016 في معظم الجمعات الامريكية ولكني ما زلت لم احقق شرط الجيمات وكنت مركز كل جهدي في اختبارات اللغة ولم اذاكر ابدا الجيمات مع ان خبرتي الوظيفية في مجالي حوالي 10 سنوات فهل تسهل لي هذه الخبرة بجانب درجة اللغة المطلوبة التجاوز عن الجيمات مع اني حجزت اختبار جيمات في ديسمبر ولكني لم اذاكر حرفا منها فهل هناك مهرب منها من فضلك شاكرا لك حسن التوجيه مقدما

  6. أحمد فلمبان

    الله يعطيك العافية. بس خلاص الكلام اللي قلته راح علي و ما يفيدني. أنا لغيت الابتعاث بسبب عدم حصولي على قبول جامعي ماستر بسبب الجيمات. أنا لم يسبق لي دراسة سنتيمتر واحد في الرياضيات الموجودة بالجيمات. و هي غير منطقية أصلا لعلاقتها بتخصص المحاسبة لكن اللي راسه عنيد يظل عنيد و أقصد بيها الجامعات الأمريكية. أنا دراستي كلها كانت محاسبة في محاسبة بدءا من الثانوية التجارية حتى تخرجت من الجامعة. عالعموم جزاك الله خير على هذه النصائح

Leave a Comment

لن يتم نشر عنوان بريدك الإلكتروني. الحقول الإلزامية مشار إليها بـ *