أول ما بدأت دراسة الدكتوراة لاحظت اعراض نفسية امر فيها بشكل كبير جداً ، منها القلق طول الوقت .. نوم قليل .. ضغط نفسي يوصل احياناً لدرجة الكئابة .. بكل إختصار ايام كثيرة اسأل نفسي ليش باعمل اللي اعمله؟ ايش الفايدة؟ بدأت اشك اني وصلت لمرحلة الكئابة بس دائماً يوقفني شيء واحد : يمكن ضغط الدكتوراة هو السبب؟
الى يوم من الايام وانا اتكلم مع اخويا ونصحني نصيحة وحدة : جرب تقلل قهوة. انهيت المكالمة من هنا، وفتحت جوجل من هنا : coffee and depression ونتائج البحث ابداً مو قليلة .. هذا اول موقع قرأته
مدعمين المقالة بدراسات مدعومة من الحكومة (حيادية من المفترض) ومن ابرز النقاط اللي خرجت بيها :
– القهوة تسبب دفعة لمزاجك انه يصير افضل، لكن النقطة السلبية انه بعد ما ينتهي مفعول القهوة .. ترجع لوضع اسوآ من قبل ما تشرب القهوة.
– القهوة تسبب panic disorders .. تخاف بشكل كبير من اشياء كثير؟ تحس بضغط نفسي غير منطقي قبل ما تعمل اشياء معينة في يومك؟ بالنسبة لي مريت بهذا الشيء للاسف .. قبل لا اتكلم مع دكتور في الجامعة (شيء عملته مرات كثير وعمري ما انربشت مرة وحدة) .. غيرها اشياء كثير.
– تحس بإعياء اغلب يومك؟ حتى لو نمت ٨ او ٩ ساعات؟ فكر في القهوة كسبب محتمل. حتى لو تقدر تنام على طول، جهازك العصبي ما يوصل للراحة اللي المفروض يوصل لها بسبب مفعول الكافين اللي موجود في جسمك. تتجاوز هذه المشكلة لو اخر كوب قهوة شربته كان قبل نومك بـ ١٢ ساعة. او شربت مويه بكمية كبيرة لدرجة جسمك اتنظف من القهوة.
– جفاف في جسمك. القهوة تعمل dehydration لجسمك بعد ثاني كوب قهوة وانت طالع.
– قلة في التركيز. تحس نفسك جالس قدام شاشة الكمبيوتر او الكتاب ومو قادر تركز؟ فكر في القهوة برضو! جسمك ما بيحصل على الاسترخاء اللازم انه يركز بسبب الضغط العصبي اللي هو فيه بسبب الكافين.
الكافين كيف يعمل في جسمك؟ يخليك على اعصابك .. يشتغل على جهازك العصبي .. وهنا سبب كل المشاكل اللي بتطلع من القهوة.
في النهاية عارف كثير يحبوا القهوة ومارح يتقبلوا هذا الكلام .. بس لازم تعرفوا اني شخصياً ما قطعت القهوة يوم واحد من اول ما بدأت اشربها قبل ٩ سنوات إلى قبل شهر ونص تقريباً. تركت القهوة وبفضل من الله قبل كل شيء مزاجي صار افضل، وتركيزي كذلك.
هذا مو معناه اني ما امر بلحظات سيئة في يومي، هذه طبيعة الحياة في النهاية. ولا معناه اني صاير اركز كأني سوبر مان. لكن لاحظت تحسن كبير قبل وبعد ما تركت القهوة. مافي شيء كبير اخر غيرته خلال هذه الفترة يخليني اقول ممكن السبب شيء ثاني.
هذه مصادر كلامي
واهم من هذه المصدرين : تجربة شخصية.
تشكر على البوست استاذ احمد , طيب كثرة الشوكولاته تعمل نفس المفعول في الجسم ولا مالها علاقة ؟ انا مااشرب قهوة ابداً بس الاحظ الاعراض نفسها موجودة مع العلم ان الانواع الي اكلها الكافيين قليل فيها
السلام عليكم
اولاً الله يوفقك و ييسر امورك
انا من متابعينك في السناب تشاب و استفدت كثير من سناباتك
فالله يجزاك خير على المحتوى المميز
و اشكر لك توثيق ما يفيد على المدونة
القهوة!
حالياً زوجتي تعاني من صداع..و كم مره اقولها اتركي القهوة..و لكنه الادمان..!! الله يتوب عليه
المهم..
مشكلة القهوة ترتبط مباشرة مع سم ثاني يعكر حياة و صحه مدمنيها..السكر
اللي يشرب قهوه بعض الاحيان يكثّر سكر لاخفاء المرارة..!!
لما تشرب مشروب حالي جداً يرتفع الجلوكوز في الدم بسرعه و الجسم يستانس و ينتشى و لكن بعد فترة يبدأ ينخفض بسرعة..فيبدأ الجسم المدمن على السكر بالتعطش له..و هذا دايم يظهر كجوع او خمول.. لذلك بعد فترة تقفل الاخلاق و تصير ما تبغى تكلم احد و بعض الاحيان يهنق عندك التفكر..!!
كاني اتكلم عنك صح..!!
طيب..ما بالك بتأثير السكر بالاضافة للقهوة خاصة للي يحبونها مركزة
الحل..
انت نجحت في ترك الجزء الاول و لكن الجزء الاهم هو السكر
ابحث عن (السم الابيض)
نصيحتي وقف اكل السكر الابيض من جميع مأكولاتك..!!
و الله بتحس بفرق في النوم و التركيز و صفاء الذهن و في النشاط..!!
جرب لمدة اسبوعين
و بالمرة خفف من المأكولات الحالية
في هذا المقطع شوف كمية السكر اللي تدخل الجسم يومياً و احكم بنفسك
http://youtu.be/F8DVf7xKrsA
انا من يوم عرفت هذي المعلومات و بديت اطبقها و انا مرتاح حقيقة و نومي و مزاجي تغير في الاوقات اللي ابعد فيها عن السكر
و احاول اشارك هذي المعلومات مع الكل و خاصة مع من احب
انت افدتني و اتمنى ان اكون افدك
الله يوفقك و يعطيك الصحة و العافية
This is a very interesting fact. Since I’m quite a coffee person, I’ll be sure to read more about this.
فعلاً انا اعاني من هذا الموضوع عندي قلق مستمر وضعف في التركيز بالاضافة الى فرط تعرق وتزيد هذه الاعراض بعد ما أشرب كافيين بساعتين تقريباً
في الليل يكون وضعي افضل بكثير
المشكلة احس شرب الشاهي/القهوة محلية بالسكر هي احلا لحظة في يومي عشان كدا مستصعبه اني اتركها :”(